කාවන්තිස්ස හස්තියාට වෙඩි තැබීමේ සිද්ධිය සම්බන්ධයෙන් ඇහැටුවැව ප්‍රාදේශීය ලේකම් කාර්යාලයට අනුයුක්ත නිපුණතා සංවර්ධන නිලධාරියෙකු අත්අඩංගුවට ගෙන තිබෙනවා. වලාන මධ්‍යම දූෂන මර්දන ප්‍රහාරක ඒකකය සහ බස්නාහිර පළාත් අඩවි වනජීවී කාර්යාලය එක්ව ඊයේ සිදුකළ මෙහෙයුමකදී අඹන්පොල, හුණුගල්ලෑව ප්‍රදේශයේදී අත්අඩංගුවට ගත් සැකකරු 56 හැවිරිදි එම ප්‍රදේශයේම පදිංචිකරුවෙක්.අත්අඩංගුවට ගන්නා අවස්ථාවේදී සැකකරු සන්තකයේ තිබී බෝර 12 ගිනි අවියක්, බෙහෙත් කොට තුවක්කුවක්, පතොරම් 24 ක්, වියළන ලද දඩ මස් පොලිස් භාරයට ගෙන තිබුණා.ගල්ගමුව සහ සියඹලන්ගමුව අවට ප්‍රදේශවල සැරිසැරූ ඩයනා නමැති අලියාට වෙඩි තබා ඇත්තේ ද මෙම සැකකරු විසින් බවට විමර්ශනවලදී අනාවරණය වී ඇති බවයි වලාන මධ්‍යම දූෂන මර්දන ප්‍රහාරක ඒකකය සඳහන් කළේ.මේ අතර, දින කිහිපයක සිට අර්ජුන, මහසෙන් සහ සැන්ඩෝ යන අලි ඇතුන් සම්බන්ධයෙන් ද කිසිදු තොරතුරක් වාර්තා වී නොමැති බවයි වනජීවී සංරක්ෂණ සංසදයේ ලේකම්, පරිසරවේදී නයනක රන්වැල්ල කියා සිටියේ.