මෙරටට නැගෙනහිර දෙසින් වර්ධනය වීමට නියමිත අඩුපීඩන කලාපය ගැඹුරු පීඩන අවපාතයක් වෙමින් ඉදිරියේදී නැගෙනහිර වෙරළට සමාන්තරව උතුරු දෙසට ගමන් කිරීමේ වැඩි හැකියාවක් පවතින බව කාලගුණ විද්‍යා දෙපාර්තමේන්තුව පවසනවා.මේ අතර මධ්‍යම කදුකරය‌ට තවදුරටත් ඇද හැලෙන අධික වැසි හේතුවෙන් ඊයේ රාත්‍රියේ සිට වික්ටෝරියා ජලාශයේ වාන් දොරටු 6 ක් ස්වයංක්‍රීයව විවෘත කර තිබෙනවා. එමෙන්ම, කොත්මලේ ජලාශයේ වාන් දොරටු හරහා තත්පරයට ඝන මීටර 150 ක ජල ධාරිතාවක් කොත්මලා ඔයට නිදහස් කිරීමට මහවැලි අධිකාරිය අද උදෑසන පියවර ගත්තා. මේ හේතුවෙන් කොත්මලා වේල්ලට පහළ කොත්මලා ඔය සහ මහවැලි ගග ආශ්‍රිත ප්‍රදේශවල ජනතාව මේ සම්බන්ධයෙන් අවධානයෙන් පසුවිය යුතු බවයි මහවැලි අධිකාරිය ප්‍රකාශ කළේ. මේ අතර, අයහපත් කාලගුණයත් සමඟ පස් කදු සහ ගල් පෙරලීමේ අවදානම හේතුවෙන් වසා දැමුණු කොළඹ - මහනුවර ප්‍රධාන මාර්ගයේ කඩුගන්නාව ඩෝසන් කුළුණ අසල සිට ගනේතැන්න දක්වා කොටස මේ වනවිට ගමනාගමනය සදහා විවෘත කර තිබෙනවා. මහනුවර දිස්ත්‍රික් ලේකම් ඉන්දික උඩවත්ත ප්‍රකාශ කළේ අවදානම හේතුවෙන් මාර්ගය විවෘත කළ ද එම කොටසේ වාහන ගමනාගමනය තවදුරටත් සීමා කර ඇති බවයි. මෙහිදී ජාතික ගොඩනැගිලි පර්යේෂණ ආයතනයේ ජ්‍යෙෂ්ඨ භූ විද්‍යාඥ ආචාර්ය වසන්ත සේනාධීර ද ප්‍රකාශ කළේ ලැබෙන වර්ෂාපතනය පුරෝකතනය කිරීමේ අපහසුවක් පවතින බැවින් නිවේදන ලබාදෙන තුරු නොසිට අවධානයෙන් කටයුතු කරන ලෙසයි.