අස්වැසුම සුබසාධක ප්‍රතිලාභ යෝජනා ක්‍රමයේ පළමු අදියරේ තොරතුරු යාවත්කාලීන කිරීමෙන් පසු ප්‍රකාශයට පත් කළ නාමලේඛනයට අදාළව අභියාචනා සහ විරෝධතා ඉදිරිපත් කිරීමේ කාලය දීර්ඝ කර තිබෙනවා.ඒ අනුව, සුබසාධක ප්‍රතිලාභ මණ්ඩලය නිවේදනය කළේ, අදින් (11) අවසන් වීමට නියමිතව තිබූ එම කාලසීමාව ප්‍රාදේශීය ලේකම් කාර්යාල මට්ටමින් කළ ඉල්ලීම් සැලකිල්ලට ගනිමින් 15 වන දින දක්වා දීර්ඝ කිරීමට තීරණය කළ බවයි.ඒ අනුව, ප්‍රාදේශීය ලේකම් කාර්යාල නිලධාරීන්ට, අයදුම්කරුවන්ට සහ පොදු මහජනතාවට මාර්ගගත (Online) ආකාරයට අභියාචනා හෝ විරෝධතා ඉදිරිපත් කිරීමට අවස්ථාව හිමිවනු ඇති.අද (11) දිනය වන විට පද්ධතිගත කර ඇති මුළු අභියාචනා ප්‍රමාණය 143,805ක් වන අතර, මහජන විරෝධතා 6,478ක් ලැබී ඇති බව එම මණ්ඩලය සඳහන් කරනවා.මාර්ගගතව අභියාචනා හෝ විරෝධතා ඉදිරිපත් කිරීමේදී තමා අයත් ප්‍රාදේශීය ලේකම් කාර්යාලයේ සුබසාධක ප්‍රතිලාභ තොරතුරු ඒකකයෙන් තාක්ෂණික සහාය ලබා ගැනීමට ද අයදුම්කරුවන්ට පහසුකම් සලසා තිබෙනවා.මේ පිළිබඳ වැඩිදුර තොරතුරු සහ සේවා සහාය 1924 ක්ෂණික ඇමතුම් අංකය ඔස්සේ ලබා ගත හැකි බව සුබසාධක ප්‍රතිලාභ මණ්ඩලය වැඩිදුරටත් දැනුම් දෙනවා.