අනුරාධපුර මිහින්තලය පොලිස් වසමේ මහනුවර - යාපනය (ඒ-09) මාර්ගයේ රඹෑව වැලිඔය හන්දිය ආසන්නයේදී අද (10) උදෑසන බස් රථ තුනක් ගැටීමෙන් සිදුවූ රිය අනතුරෙන් ලංගම බස් රථ රියැදුරෙකු සහ කාන්තාවන් දෙදෙනකු ඇතුළු සිව්දෙනෙක් මියගොස්, තවත් මගීන් 76 දෙනෙක් තුවාල ලබා රෝහල්ගත කර ඇතැයි පොලිස් මාධ්‍ය කොට්ඨාසය පවසනවා.නිවේදනයක් නිකුත් කරමින් පොලිස් මාධ්‍ය කොට්ඨාසය සඳහන් කරන්නේ, මෙම අනතුර සිදුව ඇත්තේ ජනකපුර සිට කොළඹ දක්වා ධාවනය වූ ලංගම බස් රථයක් සහ අක්කරපත්තුව සිට යාපනය දෙසට ධාවනය වූ ලංගම බස් රථයක් මුහුණට මුහුණ ගැටීමෙන් බවයි.එහිදී වව්නියාව සිට කොළඹ දක්වා ධාවනය වූ පුද්ගලික බස් රථයක්ද, කොළඹ දක්වා ධාවනය වූ ලංගම බස් රථයේ පසුපස ගැටීමෙන් මෙම අනතුර සිදුව තිබූ බවයි සඳහන් වන්නේ.අනතුරින් එක් ලංගම බස් රථයක රියැදුරෙකු හා මගීන් තිදෙනෙකු මියගොස් ඇති බවයි පොලිස් මාධ්‍ය කොට්ඨාසය සඳහන් කළේ.මරණකරුවන් අවුරුදු 47 හා 56 වයස්වල පසුවන ඇටවීරගොල්ලෑව සහ රිදිගම ප්‍රදේශවල පදිංචිකරුවන් වන අතර, මරණකාරියන් අවුරුදු 32 හා 72 වයස්වල පසුවන පදවිය හා වේයන්ගොඩ ප්‍රදේශවල පදිංචිකාරියන් වන බව ද පොලිස් මාධ්‍ය කොට්ඨාසය පවසනවා.අනතුරින් තුවාල ලැබූ 76 දෙනාගෙන් 61 දෙනෙකු අනුරාධපුර රෝහලේ ප්‍රතිකාර ලබන අතර, එම පිරිස අතර පිරිමි පුද්ගලයින් 44 ක්, කාන්තාවන් 14 ක් සහ ළමුන් තිදෙනෙක් වන බවයි පොලිසිය පවසන්නේ.තවත් තුවාලකරුවන් 12 දෙනෙකු මැදවච්චිය රෝහලේ (පිරිමි 06 ක් සහ කාන්තාවන් 06 ක් ලෙස) ප්‍රතිකාර ලබන අතර, තුවාල ලැබූ තවත් කාන්තාවන් තිදෙනෙකු මිහින්තලය රෝහලේ ප්‍රතිකාර ලබන බව ද පොලිසිය සඳහන් කරනවා.අනතුර සම්බන්ධයෙන් මිහින්තලය පොලිසිය විසින් වැඩිදුර විමර්ශන සිදු කරනු ලබනවා.