සමාජ මාධ්‍ය ජාලා හරහා සංසරණය වූ කුඩා දරුවෙකුට පහර දීමේ වීඩියෝ පටයක් සම්බන්ධයෙන් ක්‍රියාත්මක වූ එඬේරමුල්ල පොලිස් ස්ථානයේ ළමා හා කාන්තා කාර්යාංශයේ නිලධාරීන් විසින් ඊයේ (31) දින සිදුවීමට අදාල සැකකාර මව අත්අඩංගුවට ගෙන තිබෙනවා.කොම්පඤ්ඤවීදිය ප්‍රදේශයේ පදිංචි 20 හැවිරිදි මෙම සැකකාර මව එඬේරමුල්ල ප්‍රදේශයේදී අත්අඩංගුවට ගෙන ඇති අතර, වින්දිත දරුවා ද පොලිස් භාරයට ගෙන දෙදෙනාම වැඩිදුර විමර්ශන කටයුතු සඳහා කුරුඳුවත්ත පොලිස් ස්ථානය වෙත භාර දී තිබෙන බවයි පොලිස් මාධ්‍ය කොට්ඨාසය සඳහන් කළේ.පොලිසිය සිදු කළ මූලික විමර්ශනවලදී අනාවරණය වී ඇත්තේ මෙම පහරදීම පසුගිය ඔක්තෝබර් 28 වන දින සිදු කර ඇති බවයි.මෙම අවාසනාවන්ත සිදුවීමට මුහුණ දී ඇත්තේ වයස අවුරුද්දයි මාස පහක් වන කුඩා දරුවෙක්.පහරදීමෙන් තුවාල ලැබූ වින්දිත දරුවා මේ වන විට රෝහල් ගත කර ප්‍රතිකාර ලබමින් පවතින අතර, සිද්ධිය සම්බන්ධයෙන් කුරුඳුවත්ත පොලිසිය මගින් වැඩිදුර විමර්ශන ක්‍රියාත්මක කරනු ලබනවා.අත්අඩංගුවට ගත් සැකකාර මව අද (01) දින කොළඹ ප්‍රධාන මහේස්ත්‍රාත් අධිකරණය හමුවට ඉදිරිපත් කිරීමට නියමිතයි.