කඩවත - මහකඩේ හන්දිය ප්‍රදේශයේදී පොලිස් වෙඩි පහරට ලක්වූ දෙදෙනා පොලිස් අණ නොතකා පළාගොස් ඇත්තේ රියදුරු බපලත්‍ර නොමැති වීම හේතුවෙන් බවට අනාවරණය වී තිබෙනවා. ප්‍රදේශය භාර උසස් පොලිස් නිළධාරියෙකු සඳහන් කළේ, මෙම සිද්ධිය සම්බන්ධයෙන් විමර්ශනයට විශේෂ පොලිස් කණ්ඩායම් දෙකක් පත් කර ඇති බවයි.ඊයේ සිදුවූ මෙම වෙඩි ප්‍රහාරයෙන් තුවාල ලැබූ තරුණයාගේ තත්ත්වයද බරපතල බවයි රාගම රෝහලේ ආරංචිමාර්ග සඳහන් කළේ.කඩවත මහකඩේ හන්දියේදී විශේෂ රථවාහන රාජකාරියේ නිරතව සිටි නිළධාරීන් විසින් ඊයේ පස්වරුවේ ත්‍රිරෝද රථයක් නවත්වන ලෙස සංඥා කර තිබුණා. කෙසේ වෙතත්, ත්‍රිරෝද රථය එම අණ නොතකා ධාවනය කර ඇති බවයි පොලිසිය සඳහන් කළේ. එහිදී පොලිස් නිළධාරීන් ත්‍රිරෝද රථය ද හඹා ගොස් වෙඩිතබා ඇති බව පොලිස් මාධ්‍ය ප්‍රකාශක, සහකාර පොලිස් අධිකාරී එෆ්.යූ වුට්ලර් සඳහන් කළා.වෙඩි ප්‍රහාරයට ලක්වීමෙන් ත්‍රිරෝද රථයේ ගමන් ගත් 16 හැවිරිදි තරුණයෙකු තුවාල ලැබූ අතර, තවත් 17 හැවිරිදි අයෙකු අත්අඩංගුවට ගනු ලැබුවා.