හම්බන්තොට වරාය පර්යන්තයේ ආනයනය කරන ලද මෝටර් රථ ගාල් කර තිබූ අංගනයක ඊයේ (31) රාත්‍රී කාලයේදී හටගත් ගින්නට හේතුව අධික වර්ෂාමය තත්ත්වය හේතුවෙන් එල්ල වූ අකුණු පහරක් බව වරාය පොලිසිය පවසනවා.එමෙන්ම, මෙම ගින්න හේතුවෙන් අංගනයේ තිබූ මෝටර් රථ කිහිපයකට හානි සිදුව ‍තිබෙනවා.රාත්‍රී 8.45ත් 9.00ත් අතර කාලයේදී හම්බන්තොට ප්‍රදේශයට ඇදහැළුණු අධික වර්ෂාවත් සමඟ හටගත් අකුණු තත්ත්වයක් මෙම අනතුරට මුල් වී ඇති බවයි වාර්තා වන්නේ.අකුණු පහරත් සමඟ අදාළ අංගනයේ හටගත් ගින්න හමුවේ වරාය පරිපාලනය වහා ක්‍රියාත්මක වී එය වළක්වා ගැනීමට පියවර ගෙන ඇති නමුත්, මෙම අනතුරින් එහි ගාල් කර තිබූ මෝටර් රථ කිහිපයකට අලාභහානි සිදුව තිබෙනවා.සිද්ධිය සම්බන්ධයෙන් හම්බන්තොට වරාය පොලිස් ස්ථානය මගින් වැඩිදුර විමර්ශන ක්‍රියාත්මක කරනු ලබන අතර, හානි වූ වාහනවල වර්ග හෝ සමස්ත අලාභයේ නිශ්චිත වටිනාකම මෙතෙක් අනාවරණය කර ඇත්තේ නැහැ.