කාලගුණ විද්‍යා දෙපාර්තමේන්තුව විසින් නිකුත් කරන අද (02) ලද නවතම කාලගුණ අනාවැකියට අනුව, බෙංගාල බොක්ක මුහුදු ප්‍රදේශයේ පවතින 'මුරාසු' (Murasu) සුළි කුණාටුව තවදුරටත් වර්ධනය වෙමින් පවතිනවා.ඒ අනුව, බටහිර මධ්‍යම සහ ඊට යාබද නිරිත දිග බෙංගාල බොක්ක මුහුදු ප්‍රදේශයේ පැවැති 'මුරාසු' සුළි කුණාටුව, ඊයේ දින රාත්‍රී 11.30 වන විට කන්කසන්තුරයේ සිට කිලෝමීටර් 480 ක් පමණ ඊශාන දෙසින් කේන්ද්‍රගතව පැවතුනු අතර, මෙම පද්ධතිය ඉදිරි පැය කිහිපය තුළ ප්‍රබල සුළි කුණාටුවක් බවට පත්වෙමින්, අද මධ්‍යම රාත්‍රියේ සිට 03 වන දින අලුයම් කාලය අතරතුර ඉන්දියාවේ දකුණු ආන්ද්‍රා ප්‍රදේශ් වෙරළ තීරය හරහා ගොඩබිමට ඇතුළු වනු ඇතැයි අපේක්ෂා කෙරෙනවා.එහිදී, උතුරු අක්ෂාංශ 10 ත් 17 ත් සහ නැගෙනහිර දේශාංශ 80 ත් 90 ත් අතර මුහුදු ප්‍රදේශවල නැවත දැනුම් දෙන තුරු ධීවර හා නාවුක කටයුතුවලින් වළකින ලෙසයි කාලගුණ විද්‍යා දෙපාර්තමේන්තුව දැනුම් දෙන්නේ.මන්නාරම සිට කන්කසන්තුරය හරහා ත්‍රිකුණාමලය දක්වා ගැඹුරු සහ නොගැඹුරු මුහුදු ප්‍රදේශවල නැවත දැනුම් දෙන තුරු ධීවර හා නාවුක කටයුතුවලින් වලකින ලෙසත්, එම මුහුදු ප්‍රදේශවල දැනට යෙදී සිටින පිරිස් වහාම ආරක්ෂිත ස්ථාන කරා යන ලෙසත් එම දෙපාර්තමේන්තුව වැඩදුරටත් සඳහන් කරනවා.