රාජ්‍ය ආයතන 34ක් වසා දැමීමට තීරණයක්
රාජ්‍ය අංශයේ පවතින අනවශ්‍ය වැයබර අවම කරගැනීමේ පියවරක් ලෙස රාජ්‍ය ආයතන 34ක් වසා දැමීමට මුදල් අමාත්‍යාංශය මගින් තීරණය කර ඇති බව ජනාධිපති අනුර කුමාර දිසානායක පවසනවා. බත්තරමුල්ලේ පැවැති රජයේ මිනින්දෝරු දෙපාර්තමේන්තු සංගමයේ වාර්ෂික මහා සභා රැස්වීමට එක්වෙමින් ජනාධිපතිවරයා මේ බව සඳහන් කර සිටියා. එහිදී වැඩිදුරටත් අදහස් දැක්වූ ජනාධිපතිවරයා පෙන්වා දුන්නේ, රාජ්‍ය සේවය රටකට අත්‍යවශ්‍ය වුවද මහජනතාවට සේවාවන් ලබා දීම සඳහා දරන වැයබර ඉතා අධික බවයි. එම නිසා ඇතැම් රාජ්‍ය ආයතන වසා දැමීමටත්, තවත් ආයතන කිහිපයක් එකිනෙක ඒකාබද්ධ කිරීමටත් රජය තීරණය කර ඇති බවයි ජනපතිවරයා පවසා සිටියේ. මේ වන විටත් ආයතන 34ක් වසා දැමීමට අදාළ තීන්දු මුදල් අමාත්‍යාංශය මගින් ගෙන ඇති අතර, එම ක්‍රියාවලිය අධ්‍යයනය කර ක්‍රියාත්මක කිරීම සඳහා විශේෂ කමිටුවක් පත් කර ඇති බවයි ජනපතිවරයා මෙහිදී පවසා සිටියේ. එම ආයතන ආරම්භ කළ යුගයට වඩා වර්තමාන අවශ්‍යතාවයන් වෙනස් වී ඇති බවත්, එදා රාජ්‍ය අංශය පමණක් සිදු කළ ඇතැම් කාර්යයන් සඳහා අද වන විට ප්‍රබල පෞද්ගලික අංශයක් ගොඩනැගී ඇති බවත් ඔහු පෙන්වා දුන්නේය. එම නිසා එවැනි කාර්යයන් තවදුරටත් රජය විසින්ම සිදු කළ යුතුද, නැතහොත් පෞද්ගලික අංශයෙන් ලබා ගැනීම වඩාත් ලාභදායීද යන්න පිළිබඳව අවධානය යොමු කළ යුතු බව ජනාධිපතිවරයා ප්‍රකාශ කර සිටියා. වැඩිදුරටත් අදහස් දක්වමින් ජනපතිවරයා පවසා සිටියේ මෙවැනි අදහසක්. ''අපි පොඩි තීන්දුවක් ගත්තා. එය රාජ්‍ය සේවය අත්‍යවශ්‍යයි. හැබැයි සේවය ලබා දීම සඳහා දරන අපි වැය බර වැඩියි. ඒ නිසා අපි තීරණයක් අරන් තියෙනවා සමහර ආයතන වහලා දාන්න. සමහර ආයතන ඒකාබද්ධ කරන්න. දැනට අපි මුදල් අමාත්‍යාංශයෙන් ආයතන තිස් හතරක් වැහීම පිළිබඳ තීරණයක් අරන් තියෙනවා. වහන්න කමිටුවක් පත් කරලා තියෙනවා. එකක් වැහුවොත් දීමනාවක් දෙනවා. වහන එකත් අමාරුයි ඒ තරම්. මොකද මේවා විශාල පැටලිලි සහගතයි. සමහර ආයතන ගොඩනැගුණේ ඇයි.. සමහර ආයතන ගොඩනැගෙන යුගයට වඩා දැන් වෙනස් වෙලා තියෙනවා.එදා තිබුණු අවශ්‍යතාවය නෙමෙයි අද තියෙන්නේ. එදා සමහර ඒවායින් හිටියේ රාජ්‍ය අංශය විතරයි. හැබැයි අද එළියේ ලොකු පෞද්ගලික අංශයක් තියෙනවා. එතකොට ඒවා අපි විතරක්ම කරන්න ඕනෙද? එක්කෝ ඒවා අපිට අත්හරින්න පුළුවන්ද? පෞද්ගලික අපිට ගන්න එක ලාබද?ඒ නිසා අපේ අපේක්ෂාව වෙන්නේ ඕන කොහොමද වෘත්තීයවේදීන් කොහොමද අපි රාජ්‍ය සේවයට බඳවා ගන්නේ? කොහොමද වෘත්තීයවේදීන්ට ආකර්ෂණයක් බවට මේ රාජ්‍ය සේවය පත් කරන්නේ? එහෙම නැත්නම් මම හිතන්නේ අපේ රාජ්‍ය සේවය විශාල අර්බුදයකට මුහුණ දෙනවා."
